Вусъати муносибатҳои иқтисодиву иҷтимоии Чин ва Тоҷикистон

Душанбе, 4 декабр. (АМИТ «Ховар», Покиза Маҳмадбекова). – Дар Душанбе вохӯрии раиси Бонки давлатии амонатгузории Ҷумҳурии Тоҷикистон «Амонатбонк» Гулнора Ҳасанова бо сафири Ҷумҳурии Мардумии Чин дар Тоҷикистон Фан Сянжун баргузор гардид. Тавре ки дар суҳбат ба мухбири АМИТ «Ховар» аз хадамоти матбуотии бонки мазкур иттилоъ доданд, зимни вохӯрӣ ҷонибҳо масъалаҳои ҳамкории судманди марбут ба соҳаи бонкдорӣ ва вусъати муносибатҳои иқтисодиву иҷтимоии Ҷумҳурии Мардумии Чин ва Ҷумҳурии Тоҷикистонро баррасӣ карданд. Дар вохӯрӣ сафир аз ҳамкориҳои судманди Тоҷикистону Чин дар соҳаҳои мухталиф, аз қабили бонкдорӣ, иқтисодиёту иҷтимоиёт ва самараи корҳои ба анҷомрасидаву созишномаҳои ба имзорасидаи ин ду давлати дӯсту ҳамсоя изҳори қаноатмандӣ намуд. Ҳамчунин Гулнора Ҳасанова дар масъалаи ҳамкориҳои дуҷониба бо Бонки Рушди Чин, имзои созишномаҳои гуногуни байнибонкӣ миёни Тоҷикистону Чин ва такмили дониши мутахассисони бонк дар ин давлати ҳамсоя, иштирок дар ҷаласаи Созмони Ҳамкории Шонгҳой изҳори қаноатмандӣ намуданд. Дар давоми суҳбат директори иттиҳодияи истеҳсолии «Тсзинян Инхай» Ли Чао перомуни масъалаи ҳамкорӣ бо «Амонатбонк» барои сохтмони корхонаи калони истеҳсоли намудҳои гуногуни тухмӣ барои зироатпарварӣ ва рушди ин соҳа андешаҳои худро баён намуда ва иброз дошт, ки ҳадафи таҳкими равобити Тоҷикистону Чин барои имрӯзу фардои ин кишварҳои дӯсту ҳамсоя ҳамкорӣ дар самтҳои мухталиф аст.