Ҷойҳои нави корӣ барои бонувон

Кӯлоб, 7 январ.(АМИТ «Ховар», С.Холов). – Бинобар иттилои мудири бахши кор бо занон ва оилаи мақомоти иҷроияи ҳокимияти давлатии шаҳри Кӯлоб Саида Нурляминова тибқи қарори ҳукумати ҶТ дар бораи тасдиқи «Барномаи давлатии тайёр кардани мутахассисон аз ҳисоби занон ва мусоидат ба шуғли онҳо барои солҳои 2012 – 2015» дар шаҳри Кӯлоб аксари занон соҳиби ҷои кори доимӣ гаштаанд. Дар ин давра ба раёсати Агентии давлатии ҳифзи иҷтимоӣ, шуғли аҳолӣ 923 нафар зан- ҷӯяндаи кор муроҷиат кардааст, ки аз ин шумора 470 нафараш номнавис шуда, ба 170 нафар зан мақоми бекор дода шуда ва 13 нафар ба иҷрои корҳои муваққатӣ сафарбар шуданд. Инчунин 150 нафар зану ҷавондухтари бешуғл ба омӯзиши компютер, дӯзандагӣ, бофандагӣ ва зардӯзӣ сафарбар гардиданд. Гуфта мешавад, ки то ин муддат 273 нафар зан дар шаҳри Кӯлоб аз рӯи ихтисоси гуногун бо ҷои кори доимӣ таъмин гардидааст.