5 муассисаи нав барои маъюбон

Душанбе, 19 январ. (АМИТ «Ховар», Ибодат Давлатова).- Дар соли 2012 аз ҷониби муассисаҳои хизматрасонии иҷтимоии вазорат ҷиҳати беҳтар гардонидани вазъи некўаҳволии эҳтиёҷмандон ба 28 ҳазору 132 нафар аз рўи ҳамаи самтҳо хизмати иҷтимоии давлатӣ расонида шуд, ки ин нисбат ба соли 2011- ум 20 фоиз зиёд мебошад,- гуфта шуд дар нишасти матбуотии Вазорати меҳнат ва ҳифзи иҷтимоии аҳолии Ҷумҳурии Тоҷикистон. Инчунин зикр гардид, ки дар давоми панҷ соли охир маблағгузории муассисаҳои иҷтимоӣ 2,8 маротиба афзоиш ёфтааст. Илова бар ин, соли 2012 дар партави дастуру супоришҳои Президенти Ҷумҳурии Тоҷикистон аз ҷониби сарпарастон, соҳибкорон ва шахсони саховатманд ба муассисаҳои давлатии хона-интернатҳои пиронсолон ва маъюбон зиёда аз 1 млн. сомонӣ кўмаки хайриявӣ ворид гардидааст, ки барои беҳтар намудани шароити зисти бошандагони ин муассисаҳо истифода карда шуданд.Бояд гуфт, ки соли сипаришуда 5 муассисаи нави хизматрасонии иҷтимоӣ (филиали Муассисаи давлатии “Литсей — интернати касбии махсуси маъюбони Вазорати меҳнат ва ҳифзи иҷтимоии аҳолии Ҷумҳурии Тоҷикистон” дар ноҳияи Рўшони ВМКБ, Маркази тавонбахшӣ дар ноҳияи Балҷувони вилояти Хатлон, марказҳои будубоши рўзона дар шаҳри Хуҷанди вилояти Суғд, шаҳри Душанбе ва Маркази омўзишию таҷрибавии кормандони иҷтимоӣ дар ноҳияи Варзоб) ба фаъолият шуруъ намуданд.