Б. Шукуров: «2394,1 тонна сӯзишворӣ ғайристандартӣ дониста шуд»

Душанбе, 11 январ. (АМИТ «Ховар», Бекназари Абӯбакр). — Дар давоми соли 2012 озмоишгоҳҳои ташхиси маводи ғизоии Агентии «Тоҷикстандарт» дар натиҷаи ташхис 3,09 тонна маҳсулоти гӯштӣ, 14,4 тонна равғани растанӣ, 1,7 тонна макарон, 64,1 тонна орд, 2211,2 дал нӯшокии спиртӣ, 3329,6 дал нӯшокии ғайриспиртӣ, 25,6 тонна маҳсулоти қаннодӣ, 7,33 тонна маҳсулоти ширӣ, 19,7 тонна меваю сабзавот ва чандин номгӯи дигар маҳсулоти ватанию хориҷиро ғайристандартӣ донистанд, ки тибқи тартиби муайяншуда онҳо аз нав коркард ё нобуд шуданд. Ин нуктаро зимни нишасти матбуотӣ 11 январ директори Агентии стандартизатсия, метрология, сертификатсия ва нозироти савдо Бахтиёр Шукуров ба хабарнигорон зикр намуд. Вай афзуд, ки дар давраи ҳисоботӣ аз тарафи хадамоти метрологии Агентӣ дар 3028 корхонаву муассисаи ҷумҳурӣ назорати метрологии давлатӣ гузаронида шуда, 249536 адад воситаи ченак санҷида шуд, ки аз он 7693 ададаш (3,1%) бо сабаби гузаштани муҳлати санҷиш ё таъмирталаб будан корношоям ҳисобида шуданд. Бахтиёр Шукуров ба саволҳои хабарнигорон посухҳои мушаххас дода, аз ҷумла дар мавриди сифати маводи сӯхт гуфт: «Бо мақсади муайян намудани сифат ва ҳолати фурӯши маҳсулоти нафтӣ дар давоми соли гузашта якчанд санҷиш гузаронида шуд, ки дар натиҷаи он 2394,1 тонна сӯзишворӣ ғайристандартӣ дониста шуд. Аз ҷумла, 1602,9 тонна сӯзишвории бензин аз Ҷумҳурии Қирғизистон ва 367 тонна сӯзишвории дизелӣ, ки аз Ҷумҳурии Туркманистон ворид шуда буданд, бинобар мутобиқат накардан ба тамғаи дар борхат нишон додашуда ғайристандартӣ ҳисобида шуданд».