Барномаи беҳтар намудани таъмини аҳолӣ бо оби нӯшокӣ

Душанбе, 22 январ. (АМИТ «Ховар», Зарангез Латифова).- Соли сипаришуда аз тарафи идораҳои зертобеи Вазорат бо 18872 хоҷагӣ барои обрасонӣ дар майдони 538 ҳазору 350 гектар шартнома ба имзо расида , мувофиқи дархост истифодабарандагон бо об таъмин шуданд. Бо вуҷуди он ки истифодабарандагони об тибқи шартномаҳои имзогардида бо об таъмин гардидаанд, аз тарафи онҳо дар ин давра ҳамагӣ ба маблағи 41 , 3 млн. сомонӣ ё ин 61 фоизи арзиши оби додашуда пардохт шудааст, зикр намуд Раҳмат Бобокалонов, вазири мелиоратсия ва захираҳои оби кишвар зимни нишаст бо хабарнигорони ВАО 22 январ. Дар нишаст ҳамчунин зикр гардид, ки оид ба иҷрои Қарори Ҳукумати Ҷумҳурии Тоҷикистон «Барномаи беҳтар намудани таъмини аҳолии Ҷумҳурии Тоҷикистон бо оби тозаи нӯшокӣ барои солҳои 2008- 2020», ки вазорат ҳамоҳангсозии онро ба уҳда дорад, аз ҷониби вазорату идораҳои дахлдор ва мақомоти иҷроияи маҳаллии ҳокимияти давлатии шаҳру ноҳияҳо тибқи маълумоти пешакӣ баҳри таъмир, барқарорсозӣ ва таҷдиди низоми оби нӯшокии аҳолии ҷумҳурӣ ба маблағи 89,98 млн.сомонӣ ё ки 41, 8 фоизи нақшаи солона ба анҷом расидааст.