Истиқболи Наврӯз бо тозакориҳо

Душанбе, 28 январ.(АМИТ «Ховар», Марзия Саидова).-Ҷашни Наврӯзи байналмилалии соли 2013 дар пойтахти ҷумҳурӣ- шаҳри Душанбе 22 март дар «Наврӯзгоҳи пойтахт» бо намоиши театрикунонидашуда истиқбол гирифта мешавад. Ин ҷашни фархунда, ки таърихи беш аз 5 ҳазорсола дорад, 21 март дар сатҳи маҳаллаю шаҳракҳои пойтахт ва рӯзи 24 март дар Варзишгоҳи марказии шаҳри Душанбе бо ташкили мусобиқаҳои варзишӣ таҷлил мегардад. Шаҳрдории Душанбе тасмим гирифт, ки ҷиҳати истиқболи сазовори ҷашни Наврӯз ва ба ҷо овардани яке аз рукнҳои наврӯзӣ, ки тозакорию ободонист, 23 март дар пойтахт ҳашари умумишаҳрӣ гузаронад ва дар ин рӯз дар хиёбону маҳаллаҳои пойтахт ниҳол ва дарахтони сояафкану ороишӣ шинонида мешавад.   Мавриди зикр аст, ки соли гузашта ҷашни Наврӯз дар пойтахти Тоҷикистон-шаҳри Душанбе бо иштироки сарони кишварҳои форсизабон дар сатҳи баланд истиқбол гирифта шуда буд.