«Монолит-2011» Қасри фарҳанг месозад

Ҳисор, 16 январ. (АМИТ «Ховар», Ҳотам Рабиев).- Дар маркази шаҳраки Ҳисор сохтмони Қасри боҳашамати фарҳанг барои 700 ҷои нишаст оғоз гардид. Сохтмони биноро коргарони Ҷамъияти дорои масъулияти маҳдуди «Монолит-2011» ба уҳда доранд. Тибқи нақша то ҷашни 3 000-солагии Ҳисор ғайр аз таъмиру таҷдиди роҳу пулҳо, сохтмони биноҳои маъмурию истиқоматӣ боз маҷмааи варзишӣ барои 20 ҳазор ҷои нишаст дар масоҳати 16 гектар, боғи фарҳангӣ бо чойхонаи миллӣ дар масоҳати 20 гектар, мактаби таҳсилоти миёнаи умумӣ барои 640 нафар хонанда, литсей-интернат барои 250 толибилм ва бозори масолеҳи сохтмонӣ дар масоҳати 18 гектар, китобхона ва осорхона сохта хоҳад шуд.