Нақши назарраси соли 2012 дар ҳаёти сокинони шаҳри Роғун

Душанбе, 10 январ. (АМИТ «Ховар»).-Дирӯз дар мақомоти иҷроияи маҳаллии ҳокимияти давлатии шаҳри Роғун бо иштироки раиси шаҳр, муовинон ва хабарнигорон нишасти матбуотӣ доир гардид. Дар нишаст натиҷаҳои фаъолияти кормандони мақомот дар соли 2012 ва вазифаҳо барои соли 2013 баррасӣ гардид. Раиси шаҳри Роғун Шариф Шарифов зимни нишаст зикр кард, ки онҳо тӯли соли сипаригардида фаъолияти кории худро хуб ба роҳ монда, ҷиҳати баланд бардоштани сатҳи иқтисодӣ ва иҷтимоию фарҳангии рӯзгори сокинони шаҳр кӯшиши зиёд намуданд. Дар нишаст зикр шуд, ки музди миёнаи моҳонаи кормандон дар соли 2012 ба 1100,5 сомонӣ баробар буда, нисбат ба ҳамин давраи соли 2011 31,7 сомонӣ зиёд мебошад. Барои пӯшонидани хароҷоти қувваи барқ ба 139 нафар узви оилаҳои камбизоат ҷубронпулӣ ва ба 930 нафар хонанда ба маблағи 18,6 ҳазор сомонӣ кӯмакпулӣ пардохта шуд. Соли равон таъмири асосии биноҳои баландошёна ва сохтмони бинои безараргардонии об дар обанбори шаҳрӣ ба маблағи 151 ҳазор сомонӣ ба иҷро расид. Дар соли 2012 38 чорабинии фарҳангию варзишӣ гузаронида шуда, дар маркази шаҳр ва шаҳраку деҳот майдончаҳои варзишӣ барои волейбол ва футболи хурд сохта шуданд.