Нашри осори классикон ва адибони муосир

Душанбе, 22 январ.(АМИТ «Ховар», Фарзона Достонзода).- «Тибқи «Барномаи давлатии рушди фаъолияти китобдорӣ дар Ҷумҳурии Тоҷикистон барои солҳои 2006-2015» 15 ҳазору 825 адад китоби нав ба китобхонаҳои вилоятҳо, шаҳру ноҳияҳои ҷумҳурӣ тақсим гардид»,-иттилоъ дод 21 январ зимни нишасти матбуотӣ вазири фарҳанги мамлакат Мирзошоҳрух Асрорӣ. Ба қавли вазир, дар маҷмуъ аз ҷониби вазорат 155 номгӯй китоб ва дигар нашрияҳо дар ҳаҷми 291 ҳазору 600 адад чоп шуда, 97 нашрия ба қайд гирифта шудааст. Дар соли 2012 аз Фонди захиравии Президенти мамлакат Эмомалӣ Раҳмон барои нашри адабиёти бадеӣ 1 миллион сомонӣ ҷудо гардид, ки бо истифодаи он нашриёти «Адиб» 42 номгӯй асари классикон ва нависандагони муосирро бо теъдоди 93 ҳазору 500 нусха аз чоп баровард. Ҳамчунин аз ҳисоби даромадҳои ин нашриёт 37 номгӯй китоби бадеӣ ва илмию ҷамъиятӣ бо теъдоди 80 ҳазор нусха нашр гардид.