Оғози соли хониш барои магистрантон

Душанбе, 18 январ. (АМИТ «Ховар», Дилшодаи Хайруллоҳ).- Чанде пеш дар Донишкадаи такмили ихтисоси хизматчиёни давлатӣ маросими ботантанаи кушоиши соли хониши навбатӣ дар магистратура барпо гардид. Ректори Донишкада Гавҳар Шарофзода дар бобати ҳиссаи арзандаи магистратура дар омода сохтани кадрҳои болаёқати самти хизмати давлатӣ, ҳиссаи Хазинаи Ханс Зайдел дар ин самт, ғамхориҳои беназири Ҳукумати Тоҷикистонро дар тарбия ва дастгирии ҷавонон зикр намуда, аз магистрон хоҳиш кард, ки сазовори номи баланди «магистр» бошанд ва бо хониши хубу аъло ва интизоми намунавӣ соли хонишро ҷамъбаст намоянд.Зикр шуд, ки Ҳукумати Тоҷикистон барои тайёр ва тарбияи кадрҳои ҷавони болаёқат дар хизмати давлатӣ тамоми тадбирҳоро меандешад ва тамоми магистрантони пешина ва фаъолияти касбии онҳо зери назорати доимӣ ҳастанд. Роҳбари Хазинаи Ханс Зайдел дар Осиёи Марказӣ, доктор Макс Георг Майер аз номи Хазинаи олмонии Ханс Зайдел ба роҳбарияти Донишкадаи такмили ихтисоси хизматчиёни давлатӣ ва тамоми омӯзгорон барои меҳнати пурсамар изҳори миннатдорӣ кард. Ӯ гуфт, ки ҳар як давлат ба кадрҳои баландихтисос эҳтиёҷ дорад ва мақсади ниҳоии хазина ва Донишкада тайёр намудани ҳамин гуна кадрҳои ҷавон ва болаёқати соҳаи хизмати давлатӣ мебошад. Ӯ изҳори умед кард, ки магистрон баъд аз хатми магистратура аз дониши андӯхтаашон истифода карда, ба халқу ватани худ хизмати сазовор хоҳанд кард.