Р. Менглиев: «Адвокатшавандаҳо фаъол нестанд»

Душанбе, 23 январ. (АМИТ «Ховар», Лутфия Эшонқулова).- Таҳияи Қонун «Дар бораи адвокатура» моҳи марти соли ҷорӣ ба анҷом мерасад. Дар ин бора 22 январ зимни нишасти матбуотӣ муовини вазири адлияи ҶТ Абдуманнон Холиқов ба хабарнигорон иттилоъ дод. Ҳамчун роҳбари гуруҳи корӣ оид ба таҳияи қонуни мазкур А. Холиқов зикр кард, ки дар таҳияи лоиҳаи қонун ягон мушкилӣ ба назар намерасад.«Мо ният дорем, ки таҳияи қонунро дар моҳи март ба анҷом расонем ва сипас мизи мудаввар ташкил карда, лоиҳаи қонунро ба муҳокима гузорем. Танҳо баъд аз ин мо онро ба баррасии Ҳукумати ҶТ равона месозем»,-таъкид кард А. Холиқов.Ҳамзамон вазири адлияи кишвар Рустам Менглиев аз он изҳори ташвиш кард, ки мутахассисони ҷавон барои гирифтани иҷозатномае, ки ба онҳо ҳуқуқи фаъолияти адвокатиро медиҳад, талош намеварзанд. «Ман инро мушкилии ҳалталаб меҳисобам, зеро ҳар сол мактабҳои олии Тоҷикистонро 2 ҳазор ҳуқуқшинос хатм мекунад, вале ба мо барои гирифтани иҷозатнома танҳо 47 нафар муроҷиат кардааст. Як масъалаи Қонун «Дар бораи адвокатура» низ айнан ҳамин аст. Фаъолияти адвокатҳои мо ва ҷамъияти адвокатҳоро дар кори ҳимояи ҳуқуқи шаҳрвандон бояд як андоза қисматбандӣ кард»,-таъкид кард вазири адлия. Тибқи иттилои Вазорати адлия дар соли 2012 барои бурдани фаъолияти адвокатӣ танҳо 37 нафар ҳуқуқ пайдо кардааст. Аризаи 10 нафар ҳуқуқшиноси навкор бинобар ҷавобгӯй набудан ба талаботи касбӣ бозгардонида шуд.