Санади низоми сарҳади давлатӣ тасдиқ гардид

Душанбе, 17 январ.(АМИТ «Ховар», Марзия Саидова).-Созишномаи байни Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин оид ба низоми сарҳади давлатии Тоҷикистону Чинро имрӯз вакилони палатаи поёнии парлумони Тоҷикистон –Маҷлиси намояндагон тасдиқ карданд. Санади мазкурро раиси Кумитаи давлатии амнияти миллии ҷумҳурӣ Саймуъмин Ятимов дар назди вакилони парлумони мамлакат тавзеҳ дода гуфт, ки Созишнома 5 июни соли 2012 дар Пекин аз ҷониби вазоратҳои корҳои хориҷии Тоҷикистону Чин ба имзо расидааст. Созишнома тартиби нигоҳдорӣ, гузоштан ва манъи аломатҳои сарҳадӣ, гузаштани ашхос ва воситаҳои нақлиёт, интиқоли бору мол, пешбурди фаъолияти хоҷагидорӣ, шикор ва дигар фаъолият, ҳалли моҷароҳои сарҳадӣ, фаъолияти намояндагони сарҳадӣ ва соири масъалаҳои низоми сарҳади давлатии Тоҷикистону Чинро муайян намуда, тартиби ба роҳ мондани ҳамкориҳои мақомоти ваколатдори ду ҷонибро дар бахши сарҳад ба танзим медарорад.