Татбиқи лоиҳа вазъи таъминот бо обро беҳтар намуд

Душанбе, 11 январ. (АМИТ Ховар, Зарангез Латифова).- Масъалаи таъмини оби ошомиданӣ аз масълаҳои муҳими имрўзаи ҷомеа ба ҳисоб меравад.Тавре ки дар нишасти матбуотӣ ба рўзноманигорон сардори КВД «Хоҷагии манзиливу коммуналӣ» Алимурод Тағоймуродов иброз дошт: «Дар айни ҳол дар шаҳру навоҳии ҷумҳурӣ мувофиқи лоиҳаи «Рушди инфрасохтори маҳаллӣ (коммуналӣ) дар Ҷумҳурии Тоҷикистон» татбиқ мешавад, ки он аз тарафи Бонки ҷаҳонӣ маблағгузорӣ шуда, маблағи умумии лоиҳа 16 млн. 500 ҳазор доллари ИМА-ро ташкил медиҳад». Дар ҷараёни татбиқи лоиҳаи мазкур барои 8 шаҳру навоҳии ҷумҳурӣ : Қурғонтеппа , Кўлоб , Данғара , Восеъ, Ғарм (Рашт), Ваҳдат, Конибодом, ва Истаравшан 41 адад мошину таҷҳизоти махсуси коммуналӣ ва 900 адад қуттии партовҷамъкунӣ харид шуда, дар маҷмуъ ба маблағи 17 млн. 415,3 ҳазор доллари ИМА корҳо ба анҷом расидаанд. Дар натиҷаи татбиқи амалии лоиҳаи мазкур ҳолати санитарии шаҳру навоҳии пилотӣ хеле беҳтар гардида, таъмини истифодабарандагон бо оби нўшокӣ дар ин манотиқ беҳтар гардидааст. Инчунин бо дастгирии бевоситаи Ҳукумати Ҷумҳурии Тоҷикистон баҳри дар амал татбиқ шудани ин лоиҳа аз тарафи Бонки ҷаҳонӣ ҳавасмандӣ изҳор гардид ва барои барқарорсозии системаҳои обтаъминкунии ноҳияҳои Восеъ ва Фархор байни КВД «Хоҷагии манзилию коммуналӣ» ва Бонки ҷаҳонӣ ҷиҳати ҷудо намудани маблағи 11млн. доллари ИМА мувофиқа ба даст омад ва дар ин бобат байни тарафҳо Созишнома ба имзо расид. Татбиқи лоиҳаи мазкур се сол идома меёбад ва он моҳи августи соли 2015 ба анҷом мерасад. Дар ин самт корҳо оғоз гардидаву идома доранд.