Технологияи нав барои ронандагон

Душанбе, 7 январ. (АМИТ «Ховар», Ибодат Давлатова).- Ҷамъияти масъулияташ маҳдуди «Автосантал» дар ҳамдастӣ бо шуъбаҳои бақайдгирии имтиҳонотии Раёсати БДА ба ҷумҳурӣ 45 адад мошинҳои сабукрави замонавиро, ки бо таҷҳизоти аудӣ ва видеоӣ таҷҳизанд, ворид намуд.Тавре ки ба мухбири АМИТ «Ховар» аз ВКД иттилоъ доданд, мақсад аз ворид намудани мошинҳои мазкур бо технологияи муосир- ин ҷорӣ намудани шаффофият дар низоми таълими мактабҳои ронандагӣ буда, онҳо дар қабули имтиҳонот ба таври васеъ истифода мешаванд.Ҳангоми қабули имтиҳон рафтору муносибати имтиҳонгиранда ва имтиҳонсупоранда тавассути дастгоҳҳои видеоӣ сабт гардида, воқеияти онро инъикос менамояд. Сабтҳои видеоӣ дар архиви шуъбаҳои бақайдгирии имтиҳонотии РБДА маҳфуз мемонанд. Ин ҳолат ба талаботе, ки барои қабули имтиҳонот ҷорӣ шудааст, ҷавобгӯй мебошад.Минбаъд нафароне, ки дар мактабҳои ронандагӣ таҳсил мекунанд, барои ба даст овардани шаҳодатномаи ронандагӣ ва соҳиб гардидан ба дараҷаҳои «Б» ва «Д» ҳатман дар ин нақлиёт имтиҳон месупоранд ва дастгоҳҳои компютерӣ аз таълимгиранда оддитарин талаботи ронандагиро талаб менамояд.Ба роҳ мондани чунин талабот аз довталабон тақозо менамояд, ки қоидаҳои ронандагиро дар сатҳи баланд азхуд намоянд. Лозим ба ёдоварист, ки чунин технологияи муосир бори аввал дар Осиёи Миёна дар Тоҷикистон мавриди истифода қарор мегирад, таъкид намуд манбаъ.