В.Никитюк: «Украина ба ҷилавгирии маводи мухаддир дар Тоҷикистон таваҷҷуҳ дорад»

Душанбе, 24 январ. (АМИТ «Ховар», Ибодат Давлатова).-Сафири Украина дар Тоҷикистон зикр кард, ки хадамоти зиддимухаддиротии кишвараш омодаи ҳамкориҳои амалӣ бо Агентии назорати маводи нашъаовари назди Президенти Ҷумҳурии Тоҷикистон аст. Дар ин бора Сафири Фавқулодда ва Мухтори Украина дар Ҷумҳурии Тоҷикистон Виктор Никитюк дар суҳбат бо директори агентӣ генерал-лейтенанти милитсия Рустам Назаров иброз дошт. Дар ҷараёни мулоқот директори агентӣ сафирро бо вазъи мухаддиротӣ дар Тоҷикистон, Афғонистон ва умуман минтақаи Осиёи Марказӣ, чораву тадбирҳое, ки Ҳукумати Ҷумҳурии Тоҷикистон дар самти назорати маводи мухаддир меандешад ва ташкили ҳамкориҳо миёни мақомоти ҳифзи ҳуқуқи ҷумҳурӣ ва кишварҳои хориҷӣ дар муборизаи муштарак бо муомилоти ғайриқонунии маводи нашъадор ошно намуд. Дар поёни мулоқот ҷонибҳо ба таҳкими ҳамкориҳо миёни Ҷумҳурии Тоҷикистон ва Украина дар самти мубориза бо муомилоти ғайриқонунии маводи мухаддир изҳори умед карданд.Дар ин бора ба мухбири АМИТ «Ховар» аз агентии мазкур иттилоъ доданд.