100 ҳазор сомонӣ доруворӣ ба ВКД

Душанбе, 26 феврал. (АМИТ «Ховар», Ибодат Давлатова).- Имрӯзҳо бо мақсади мусоидат намудан дар мубориза бар зидди ҷинояту ҷинояткорӣ аз ҷониби корхонаву ташкилотҳои бонуфуз ба мақомоти корҳои дохилӣ кӯмаки беғаразона расонида мешавад.Тавре ки ба мухбири АМИТ «Ховар» аз ВКД иттилоъ доданд, чунин як кӯмаки башардӯстона аз ҷониби директори Маркази «Клиникаи офият ва азнавбарқароркунии пайрави Сино»-и Ҷумҳурии Тоҷикистон Ситам Алиматов ба Вазорати корҳои дохилӣ ба маблағи 100 ҳазор сомонӣ доруворӣ ҳамчун ёрии башардӯстона расид. Қобили зикр аст, ки ин амали ҷавонмардона ба мақомоти корҳои дохилӣ на танҳо дар мубориза бар зидди ҷинояткорӣ, балки дар вазъи сиҳатию саломатии онҳо ва ҳифзи ҳуқуқу озодиҳои шаҳрвандон кӯмаки амалӣ мерасонад. Ин амали хайр барои дигар ташкилоту ширкатҳое, ки имконияти дастгирӣ намудани мақомоти ҳифзи ҳуқуқро доранд, бояд намунаи ибрат бошад, то ки дар таъмини тинҷию амонӣ ва ҳифзи ҳуқуқҳои шаҳрвандон ҳиссаи худро гузоранд.