Баҳисобгирии пурраи шаҳрвандони ҶТ

Душанбе, 19 феврал. (АМИТ «Ховар», Музаффар Рустамов). -Яке аз масъалаҳои муҳиме, ки ба зиммаи Хадамоти муҳоҷират вогузор шудааст, баҳисобгирии рафтуомади шаҳрвандони ҶТ ба ҳисоб меравад. Дар асоси қарори Ҳукумати Ҷумҳурии Тоҷикистон «Дар бораи бақайдгирии муҳоҷирати шаҳрвандони Ҷумҳурии Тоҷикистон ба хориҷа ва бозгашт аз хориҷа», Хадамоти муҳоҷират дар ҳамаи гузаргоҳҳои сарҳадӣ ва фурудгоҳҳои ҷумҳурӣ баҳисобгирии рафту омади пурраи шаҳрвандонро тавассути варақаи бақайдгирии муҳоҷирати шаҳрвандони Ҷумҳурии Тоҷикистон ба роҳ мондааст.Хадамоти муҳоҷират на танҳо шумораи муҳоҷирони меҳнатӣ, балки рафтуомади тамоми шаҳрвандони ҷумҳуриро ба ҳисоб мегирад. Дар моҳи январи соли 2013 ба хориҷа 68 ҳазору 675 нафар шаҳрванди ҷумҳурӣ сафар намуд, ки аз ин теъдод, 55 ҳазору 34 нафараш мард ва 13 ҳазору 41 нафараш зан мебошад. Аз шумораи умумии шаҳрвандони ба хориҷа сафар намуда 58 ҳазору 062 нафараш муҳоҷири меҳнатист. Дар ин бора ба АМИТ”Ховар” аз шуъбаи робита бо ҷомеаи Хадамоти муҳоҷирати назди Ҳукумати ҶТ Абдулло Қодирӣ иттилоъ дод.