Беҳдошти сифати таълим ва пойгоҳи моддию техникӣ

Душанбе, 19 феврал. (АМИТ «Ховар», Дилшодаи Хайруллоҳ).- Дар низоми омодасозии кадрҳои ронандагӣ батадриҷ меъёри сифат шарти асосии пояи обрӯ ва маҳбубияти дилхоҳ муассисаи таълимӣ новобаста ба шакли моликияти он мегардад. Ин соҳа ба яке аз шохаҳои бозори хизматрасонӣ табдил ёфтааст, ки қонуниятҳои хоси талаботи худро дорад. Дар семинаре, ки бо иштироки масъулони дахлдори зинаҳои гуногуни созмони мудофиавии кишвар рӯзи 15 – феврали соли равон доир шуд, муовини раиси КМ ТҶММ оид ба қисми таълимию истеҳсолӣ, сардори мактаби муттаҳидаи техникии ҷумҳуриявӣ полковник Аҳмадхон Амонов изҳор дошт, ки агар чанд сол муқаддам барои довталаби ихтисоси ронандагӣ танҳо дарёфти ҳуҷҷат ва идораи мошин муҳим буд, дар айни ҳол онҳое, ки нияти ронанда шудан доранд, ба сифати таълим, заминаи моддию техникӣ ва дараҷаи таъминот бо воситаҳои айёнии электронӣ аҳамияти бештар зоҳир мекунанд.Иштирокдорони семинар зимни баргузории он аз роҳҳои беҳдошти сифати таълим ва тақвияти пойгоҳи моддию техникӣ иттилои бештар пайдо намуда, аз синфхонаи намунавии мактаби муттаҳидаи техникии ҷумҳуриявӣ дидан намуданд, то дар кумитаву мактабҳои худ чунин синфхонаҳоро ташкил кунанд.