«Хуаксин Ғаюр Семент» истеҳсоли сементро дучанд мекунад

Душанбе, 8 феврал. (АМИТ «Ховар», Кристина Эрлих). – Дар соли ҷорӣ дар мамлакат истеҳсоли 480 ҳазор тонна семент дар назар дошта шудааст, ки ин нисбат ба нишондиҳандаҳои соли гузашта ду маротиба зиёд аст. Дар ин бора ба хабарнигори АМИТ «Ховар» аз Вазорати энергетика ва саноати ҶТ иттилоъ доданд. Ба иттилои манбаъ дар соли гузашта дар кишвар 232 ҳазору 400 тонна семент истеҳсол гардид. Имсол дар назар аст, ки дар соҳаи истеҳсоли семент корхонаҳои нав ба истифода дода шаванд. Аз ҷумла дар нимсолаи дуюм корхонаҳои «Хуаксин Ғаюр Семент» ва «Ваҳдат-Хуалун» бо иқтидори истеҳсоли 1 миллион тонна ва 50 ҳазор тонна семент дар як сол ба кор дароварда мешаванд. «Тамоми корхонаҳои соҳа барои истеҳсоли маҳсулоти худ ба ҷои гази табиӣ ангиштро истифода мебаранд»,-хабар доданд аз Вазорати энергетика ва саноати ҶТ.