Иқтисоди кишвар дар ҳоли рушд аст

Душанбе, 6 феврал.(АМИТ «Ховар», Марзия Саидова).-Афзоиши воқеии маҷмӯи маҳсулоти дохилии /ММД/ кишвар дар соли 2012 нисбат ба соли 2011 –ум 7, 5 %-ро ташкил дода, ҳаҷми номиналии он ба 36, 2 миллиард сомонӣ баробар гардид.  Шариф Раҳимзода — вазири рушди иқтисод ва савдои ҷумҳурӣ мегӯяд, ки дар соли сипаригардида ММД асосан аз ҳисоби зиёдшавии истеҳсоли молҳо дар саноати сабук, кимёвӣ ва саноати кӯҳӣ таъмин карда шуд. Нисбат ба соли 2011 истеҳсоли маҳсулоти нассоҷӣ 22, 4%, чарм ва маҳсулоти чармӣ 49,4 % , маҳсулоти резинӣ ва пласмассӣ 43,6 %, маҳсулоти тайёри филизӣ 42,3 %, маъданҳои филизӣ 22,4 % ва истихроҷи ангишт 74 % зиёд шудааст, ки ин тамоюли фарқкунанда нисбат ба солҳои қаблӣ дар иқтисодиёти кишварамон буда, захираҳо барои истеҳсоли молҳои мазкур дар ҷумҳурӣ зиёд мебошад. Соҳаҳои зикргардида дар оянда имкон доранд ҳиссаи худро дар афзоиши ММД боз ҳам бештар гардонанд. Вазир афзуд,ки ҳиссаи истеҳсоли молҳо дар соли 2012 нисбат ба дигар қисматҳои ММД 2,6 банди фоизӣ зиёд шудааст. Ин шаҳодати он аст, ки дар соли 2012 дар кишварамон корхонаҳои нав бунёд ва беш аз 130 ҳазор ҷои кори нав муҳайё шуда, истеҳсоли молҳо зиёд гардидааст. ММД дар соли гузашта ба ҳар нафар аҳолии кишвар 4 ҳазору 590 сомонӣ, муодили 964 $ -ро ташкил дод, ки он нисбат ба соли 2011 (3 ҳазору 900 сомонӣ ё 846 $) 17,7 % зиёд аст.