Иштироки ҳунармандони тоҷик дар «Сураҷкунд»

Душанбе, 25 феврал. (АМИТ «Ховар», Раъно Нусратуллоева).-Тавре ки аз Вазорати фарҳанги Ҷумҳурии Тоҷикистон хабар доданд, тибқи дастури роҳбари дастгоҳи иҷроияи Президенти Ҷумҳурии Тоҷикистон, аз 1 то 14 феврали соли ҷорӣ ҳунармандони тоҷик дар Фестивал-намоиши ҳунарҳои мардумӣ- «Сураҷкунд» дар шаҳри Фаридободи Ҷумҳурии Ҳиндустон ширкат намуданд. Фестивали мазкур бо иштироки намояндагони 21 кишвари олам доир гардид. Дар маросими ифтитоҳи он Президенти Ҷумҳурии Ҳиндустон Пранаб Кумар Мукерҷи иштирок ва суханронӣ намуд. Дар барномаи консертии кушоиши чорабинӣ дар ҳузури Президенти ин кишвар ва дигар меҳмонони расмӣ аз байни намояндагони дигар кишварҳо ҳунармандони тоҷик бо баромади рақсии гуруҳӣ ба муддати 5 дақиқа ҳунарнамоӣ намуданд. Намоиши барномаи мазкур аз ҷониби расонаҳои хабарии аксар кишварҳои ҷаҳон ба навор гирифта шуда, аз тариқи барномаҳои мухталифи телевизионҳои олам пахш гардид. Ҳамчунин ҳунармандони мо ҳамарӯза дар барномаи консертие, ки бо ширкати ҳамаи давлатҳои иштирокчӣ намоиш дода мешуд, фаъолона ширкат варзида, бо ҷаззобияти мусиқӣ ва либоси фарқкунанда назаррас буданд. Барномаи консертии ҳунармандони мо, ки аз рақсу сурудҳои ҷолиби халқию муосир иборат буд, мақбули тамошобинон гардид. Махсусан ҳунарнамоии гуруҳи рақсӣ, аз ҷумла рақсҳои яккаи Хайринисо Ватанова, сурудҳои Ҳунарпешаи халқии Тоҷикистон Муродбек Насриддинов, овозхони шинохта Таҳмина Ниёзова аз ҷониби тамошобинон хеле хуб пазируфта шуданд. Сафари мазкур дар маҷмуъ аз оғоз то анҷом хеле муваффақона буд ва барномаҳои консертии гуруҳро дар ин муддат тамошобинони хеле зиёд диданд ва санъати волои тоҷикон аз саҳнаи ин Фестивали бошукуҳи байналмилалӣ барои оламиён арзанда муаррифӣ гардид.