«Кайҳон аз нигоҳи ман»

Хуҷанд, 28 феврал. (АМИТ «Ховар», С. Маҳкамов).-Дар планетарияи ҷумҳуриявии ба номи Абумаҳмуди Хуҷандии шаҳри Хуҷанд намоиш-озмуни рассомони навраси муассисаҳои таълимии шаҳру ноҳияҳои вилоят баргузор гардид. Мақсади чорабинӣ бедор намудан ва ташаккули қобилияти эҷодии рассомони ҷавон нисбат ба илмҳои табиӣ ва кайҳоншиносӣ ба шарафи 170- солагии астроном ва ҷуғрофидони машҳури тоҷик Ҳоҷӣ Юсуф Мирфаёзов буд. Ба намоиш зиёда аз 50 нафар рассоми ҷавон аз муассисаҳои рассомии шаҳрҳои Хуҷанд, Исфара, Конибодом, Чкалов ва ноҳияҳои Ҷ.Расулов, Спитамен, Б.Ғафуров ва факултаи рассомию графикии ДДХ ба номи академик Б.Ғафуров аз рўи панҷ мавзуъ роҷеъ ба кайҳон ва кайҳоншиносӣ, мусаввараҳои дастаҷамъона ва фаръии худро пешниҳод намуданд. Ғолибон бо дипломҳои дараҷаҳои 1-ум, 2-юм, 3-юм ва бо туҳфаҳои хотиравӣ қадрдонӣ шуданд. Намоиши расмҳо то охири моҳи феврали соли равон давом хоҳад кард.