Курси омӯзиши кори телевизион дар ДМТ

Душанбе, 14 феврал. (АМИТ «Ховар», Баҳманёр Муродов).- Пагоҳ, 15-уми феврал дар факултаи журналистикаи Донишгоҳи миллии Тоҷикистон донишҷӯён пас аз хатми курси семоҳаи омӯзиши малакаҳои наворбардориву танзими барномаҳои телевизионӣ аввалин сужаҳои телевизионии омода намудаашонро ба тамошои устодону журналистони касбии кишвар мегузоранд. «Ин курси омӯзишӣ бо ташаббуси раёсати донишгоҳ ва Ташкилоти ҷамъиятии Созмони рушди журналистони ҷавон» дар пояи студияи таълимии факултаи журналистика гузаронида шуда, ҳадафи он ба донишҷӯён омӯзонидани ҳунари наворбардорӣ, танзимгарӣ ва кор кардан бо дигар техникаҳои телевизион буд, аммо то куҷо мо ба ин мақсад расидем, пагоҳ устодон баҳо медиҳанд»,- иброз дошт дар суҳбат бо хабарнигори АМИТ «Ховар» мудири студияи таълимии телевизиони Донишгоҳи миллии Тоҷикистон Зафари Аскар. Ҳамчунин бояд зикр кард, ки студияи таълимии факултаи журналистикаи ДМТ соли гузашта фаъолияти худро оғоз кардаву ҳар моҳ барномаеро бо номи «Паёми Донишгоҳи миллӣ » омода ва дар шабакаи телевизионии «Ҷаҳоннамо» пахш мекунад.