Натиҷаҳои конфронси АПСҲИ

Душанбе, 12 феврал.(АМИТ «Ховар», Марзия Саидова).-Дар Исломобод имрӯз конфронси якуми Ассамблеяи парлумонии кишварҳои аъзои Созмони ҳамкориҳои иқтисодӣ /СҲИ/, ки муддати ду рӯз идома дошт, анҷом ёфт. Рўзномаи конфронс, ки фарогири масъалаи «Нақши парламентҳо дар дастгирии савдо ва сармоягузории дохили минтақавӣ ҷиҳати кафолати рушди устувор ва иҷтимоиву иқтисодӣ дар минтақаи СҲИ» буд, тасдиқ шуд. Конфронс, ки таҳти раёсати Фаҳмида Мирзо, раиси Ассамблеяи миллии Покистон доир гардид, дар он ҳамзамон раисони парлумонҳои Тоҷикистон, Туркия, Эрон ва муовини раиси парлумони Афғонистон доир ба ҳадаф ва нақшаҳои ояндаи конфронси мазкур ибрози назар намуданд. Аз рӯи масъалаи баррасишуда миёни намояндагони парлумонҳои кишварҳои аъзои СҲС ва дигар иштирокдорони конфронс муҳокимарониҳои судманд сурат гирифт ва вобаста ба масъалаи муҳокимашуда қарори дахлдор қабул гардид.Бояд гуфт, ки баргузории Конфронси мазкур барои таҳкими ҳамкориҳои давлатҳои аъзои Ассамблеяи парлумонии кишварҳои аъзои СҲИ заминаи мусоид фароҳам оварда, ҳамзамон омили муҳим ҷиҳати густариши муносиботи байнипарлумонӣ миёни кишварҳои аъзо маҳсуб мешавад. Намояндагони парлумонҳои кишварҳои аъзои СҲИ дар фарҷоми кори конфронси якуми Ассамблеяи парлумонии кишварҳои аъзои СҲИ аз ёдгориҳои таърихӣ ва фарҳангии Покистон дидан карданд.