Нишондиҳандаҳои макроиқтисодӣ ва низоми бонкии ҷумҳурӣ муътадиланд

Душанбе, 28 феврал. (АМИТ «Ховар», Покиза Маҳмадбекова). — Раванди рушди нишондиҳандаҳои макроиқтисодӣ ва низоми бонкии ҷумҳурӣ дар моҳи январи соли 2013 дар сатҳи нисбатан муътадил қарор дошт.  Аз рӯи иттилои Бонки миллии Тоҷикистон, ҳаҷми ММД дар ин давра ба 2,1 млрд. сомонӣ баробар шуда, суръати рушди воқеии он 7,1 фоизро ташкил намуд. Рушди муътадил дар бахшҳои асосии иқтисодиёти кишвар аз қабили, гардиши савдои чакана — 12,2 фоиз, хизматрасонӣ — 9,4 фоиз, истеҳсоли маҳсулоти кишоварзӣ — 6,3 фоиз ва маҳсулоти саноатӣ — 5,0 фоиз ба қайд гирифта шуд. Сатҳи таваррум дар ин давра раванди муътадилро нигоҳ дошта, 0,5 фоизро ташкил намуд, ки дар муқоиса бо ҳамин давраи соли қаблӣ ҳамагӣ 0,1 банди фоизӣ зиёд мебошад. Нишондиҳандаи мазкур дар маҷмуъ аз ҳисоби болоравии нархҳои хизматрасонии пулакӣ 1,7 фоиз, маҳсулоти хӯрокворӣ 0,4 фоиз ва маҳсулоти ғайрихӯрокворӣ 0,2 фоиз ба миён омад. Ҳамзамон сатҳи таварруми солона (барои 12 моҳи охир) 6,5 фоизро ташкил дода, нисбат ба ҳамин давраи соли қаблӣ 1,2 банди фоизӣ кам мебошад. Тибқи таҳлилҳои мутахассисони БМТ дар моҳи январи соли равон сатҳи таварруми аслӣ 0,16 фоизро ташкил намуд, ки нисбат ба ҳамин давраи соли гузашта 0,33 банди фоизӣ кам мебошад.