Рушди инфрасохтор дар минтақаҳои озоди иқтисодӣ

Душанбе, 13 феврал. (АМИТ «Ховар», Покиза Маҳмадбекова). — Дар Душанбе вохӯрии вазири рушди иқтисод ва савдои ҷумҳурӣ Шариф Раҳимзода 13 феврали соли ҷорӣ бо роҳбари намояндаи доимии Ташкилоти Оғохон оид ба рушд дар Тоҷикистон Акбар Алӣ Песнанӣ баргузор гардид.  Ба мухбири АМИТ «Ховар» аз хадамоти матбуотии вазорати мазкур иттилоъ доданд, дар вохӯрӣ масъалаи вусъати ҳамкориҳои мутақобилан судманд мавриди баррасӣ қарор гирифт. Акбар Алӣ Песнанӣ дар навбати худ иброз дошт, ки ба ҳайси роҳбари намояндаи доимии Ташкилоти Оғохон оид ба рушд дар Тоҷикистон баҳри пеш бурдани муносибатҳои мутақобила бо бисёр шарикони ҳавасманд, аз ҷумла ҶТ аз тамоми имкониятҳои мавҷуда истифода хоҳад кард. Дар мулоқот масъалаҳои рушди инфрасохтор дар минтақаҳои озоди иқтисодӣ, ташкили курсҳои бозомӯзӣ дар соҳаи мухталифи иқтисод дар қаламрави кишвар ва дигар масоил мавриди таҳлилу баррасии амиқ қарор гирифтанд.