Таъсиси Шӯрои машваратӣ дар водии Рашт

Душанбе, 8 феврал. (АМИТ «Ховар», Бекназари Абӯбакр). — 7 феврал миёни Кумитаи давлатии сармоягузорӣ ва идораи амволи давлатии Ҷумҳурии Тоҷикистон ва Созмони Амнияту Ҳамкорӣ дар Аврупо Меморандум оид ба ҳамкорӣ ба имзо расид. Ба Меморандум раиси кумитаи мазкур Давлаталӣ Саидов ва муовини роҳбари САҲА Х.П. Ларсен имзо намуданд.Аз Кумитаи давлатии сармоягузорӣ ва идораи амволи давлатӣ ба АМИТ «Ховар» иттилоъ доданд, ки мувофиқи Меморандуми мазкур ҷиҳати иҷрои дастуру супоришҳои Президенти Ҷумҳурии Тоҷикистон Шӯрои машваратӣ оид ба беҳтар намудани фазои сармоягузорӣ дар минтақаи Рашт (Ҷиргатол, Тоҷикобод, Рашт, Нуробод ва Тавилдара) таъсис дода мешавад, ки дастгирии техникии онро ҷониби САҲА ба уҳда дорад.Бояд гуфт, ки мақсад аз таъсиси шӯрои машваратӣ мусоидат намудан ба рушди соҳибкорӣ ва сармоягузорӣ дар ноҳияҳои минтақаи Рашт мебошад.