Вохӯрии И. Сатторов бо Томаш Дуб

Душанбе, 28 феврал (АМИТ «Ховар»).- 26 феврали соли 2013 мулоқоти Сафири Фавқулодда ва Мухтори Ҷумҳурии Тоҷикистон дар Ҷумҳурии Чехия (қароргоҳ дар Берлин) Имомуддин Сатторов ва муовини вазири корҳои хориҷии Чехия Томаш Дуб доир гашт. Дар мулоқот ҳамчунин мудири кулли раёсати масоили иқтисодӣ Иван Юкл ва мудири кулли шуъбаи робитаҳо бо кишварҳои ғайриаврупоии Вазорати корҳои хориҷии Чехия ҳузур доштанд. Зимни вохӯрӣ ҳолат ва дурнамои густариши муносибатҳои Тоҷикистону Чехия мавриди баррасӣ қарор гирифтанд. Дар ҷараёни вохӯрӣ оид ба роҳҳои тақвияти ҳамкориҳои иқтисодии Тоҷикистон ва Чехия, барқарор намудани робитаҳои наздик миёни доираҳои соҳибкории ду кишвар ва тавсеаи заминаи шартномавию ҳуқуқии муносибатҳо дар соҳаҳои мавриди таваҷҷуҳи тарафайн табодули назар сурат гирифт. Намояндагони Вазорати корҳои хориҷии Чехия хамчунин бо ҳадафҳо ва вазифаҳои Конфронси байналмилалии сатҳи баланд оид ба ҳамкорӣ дар соҳаи об, ки августи соли ҷорӣ дар шаҳри Душанбе баргузор мегардад, шинос шуданд. Аз доираҳои расмӣ, созмонҳои ғайриҳукуматӣ, намояндагони бахши хусусӣ, марказҳои илмию тадқиқотӣ ва дигар доираҳои марбутаи Чехия даъват шуд, ки дар кори конфронс фаъолона ширкат варзанд.