«Зарбулмасал -дар сухан асал»

Душанбе, 19 феврал. (АМИТ «Ховар», Ҳотам Рабиев).-Беҳтарин зарбулмасалу мақолҳои 33 халқи ҷаҳонро дар як маҷмӯа гирд оварда, дастраси хонандагон гардонидани олими ҷавону сермаҳсул Дилшод Раҳимов бешубҳа амали нек аст. Китоби мазкур таҳти унвони «Гулчини зарбулмасалу мақолҳои халқҳои ҷаҳон» аз тариқи нашриёти «Истеъдод» нашр гардид. Мураттиб бештари зарбулмасалу мақолҳоро аз маҷмӯаҳои гуногун аз забони русию англисӣ ва ғайра ба забони тоҷикӣ тарҷума намудааст.Дар зарбулмасалу мақол- афкору таҷриба, маишату муносибот ва арзишҳои моддиву маънавии мардумон бозтоб ёфтааст. Ҳамчунин дар ин жанри фолклор таҷрибаҳои чандинасраи мардум хеле муъҷаз ва ихчам оварда шудаанд.