Ҳавасмандии соҳибкорони хориҷӣ ба сармоягузорӣ дар Тоҷикистон

Душанбе, 14 март. (АМИТ «Ховар», Бекназари Абӯбакр). — Дар шаҳри Душанбе чанде қабл бо иштироки соҳибкорони Эрон, Туркия, АМА, Чехия ва Тоҷикистон форуми соҳибкорон баргузор гардид. Аз Кумитаи давлатии сармоягузорӣ ва идораи амволи давлатии Тоҷикистон ба АМИТ «Ховар» иттилоъ доданд, ки раиси кумита Давлаталӣ Саидов фаъолияти соҳибкориро яке аз омилҳои асосии рушди босуботи иқтисодиёти Ҷумҳурии Тоҷикистон арзёбӣ намуда, иброз дошт, ки фароҳам овардани фазои мусоид барои соҳибкорию сармоягузорӣ ва бартараф намудани ҳама гуна монеаҳое, ки дар ин самт ҷой доранд, аз ҳадафҳои сиёсати иқтисодию иҷтимоии Ҳукумати Ҷумҳурии Тоҷикистон ба шумор меравад.Аз ҳамаи соҳибкорон даъват шуд, ки ҷиҳати рушди иқтисодию иҷтимоии ҷумҳурӣ дар доираи қонунгузориҳои амалкунанда бо истифода аз имкониятҳо ва захираҳои мавҷуда саҳмгузор бошанд.Дар ҷараёни форум ҷонибҳо ҳавасмандии худро доир ба густариши ҳамкориҳои мутақобилан судманд иброз намуда, омодагии худро барои дар оянда густариш бахшидани корҳо дар самти соҳибкориву сармоягузорӣ иброз намудаанд.