Дар Восеъ ба табиб эҳтиёҷ зиёд аст

Восеъ, 16 март. (АМИТ «Ховар», С.Холов). – Раёсати агентии давлатии ҳифзи иҷтимоӣ шуғли аҳолӣ ва муҳоҷирати ноҳияи Восеъ мувофиқи нақша моҳе як маротиба ярмаркаи ҷойҳои корӣ ва вазифаҳои озодро мегузаронад, ки даҳҳо нафар сокинон ба воситаи он соҳиби ҷои кор мегарданд. Дар ярмаркае, ки чанде пеш доир шуд, муассисаҳои тандурустии ноҳия наздики дусад ҷои кориро барои ҷойҳои холии ҳамшираи шафқат то духтурони маълумоти олидор пешниҳод карданд. Бино бар иттилои масъулини Раёсати агентии давлатии иҷтимоӣ, шуғли аҳолӣ ва муҳоҷирати ноҳияи Восеъ дар ярмарка 11 нафар барои кор роҳхат гирифта 38 нафари дигар ба касбомӯзӣ фиристода шуданд. Умуман то охири моҳи феврали соли 2013 бо масъалаи шуғл ба агентӣ 318 нафар сокинон муроҷиат кардаанд, ки 116 нафар и онҳоро занон ташкил мекунанд. Ярмаркаи навбатӣ бо иштироки корхонаҳои саноатӣ ва соҳаи кишоварзӣ доир мегардад.