Хонандагони тоҷик дар нанотехнология ҳам пешсафанд

Душанбе, 28 март. (АМИТ «Ховар», Баҳманёр Муродов).-Се нафар хонандаи гимназия- парваришгоҳи муштараки Тоҷикистону Русия- «Ҳотам ПВ» дар шаҳри Маскав дар озмуни интернетие бо номи «Нанотехнология — ҷаҳиш ба оянда» ғолиб омада, барандагони ҷоизаҳои ин озмун шуданд. Бино ба иттилои устоди ин гимназия Хурсанд Ёров озмуни мазкур байни хонандагони макотиби миёна, донишҷӯён ва пажуҳишгарон баргузор гардида, хонандагони гимназияи онҳо Умеда Мирова , Илҳомҷон Баҳодурзода ва Дониёр Ғолиев ғолиб шудаанд. Ин бори аввал нест, ки мактабхонони тоҷик дар озмунҳои соҳаи нанотехнология пирӯз мешаванд. Чанд сол қабл Хурсанд Ёров, хатмкардаи гимназияи «Ҳотам ПВ» ҳам дар озмуни нанотехнологие дар Маскав дастболо гардида буд.