Мулоқотҳои Р.Назаров дар СММ

Душанбе, 18 март. (АМИТ «Ховар», Лутфия Эшонқулова). – Директори Агентии назорати маводи мухаддири назди Президенти ҶТ Рустам Назаров дар ҳошияи иштирок дар иҷлосияи 56 – уми Комиссияи СММ оид ба маводи мухаддир, ки ҳафтаи гузашта дар шаҳри Вена баргузор гардид, якчанд мулоқоти расмӣ анҷом дод. Рустам Назаров, аз ҷумла, бо муовини Дабири Кулли СММ, директори иҷроияи Раёсати СММ оид ба маводи мухаддир ва ҷинояткорӣ Юрий Федотов мулоқот намуд. Юрий Федотов дар ҷараёни мулоқот ҳамкории дуҷонибаро ба дараҷаи баланд арзёбӣ намуда, барои фаъолияти Ҳукумати Тоҷикистон ва мақомоти ҳифзи ҳуқуқи он ҷиҳати ҷилавгирии қочоқи маводи мухаддир дар минтақа изҳори миннатдорӣ кард. Зикр шуд, ки Раёсати СММ оид ба маводи мухаддир ва ҷинояткорӣ минбаъд ҳам ба татбиқи лоиҳаҳои мубориза бо маводи мухаддир дар Ҷумҳурии Тоҷикистон таваҷҷӯҳи хоса зоҳир менамояд.Директори Агентии назорати маводи мухаддири кишвар дар ҷараёни сафараш бо ҳайати Ҷумҳурии Исломии Эрон бо сарварии вазири корҳои дохилӣ — Дабири Кулли Қароргоҳи назорати маводи мухаддири Эрон Мустафо Муҳаммаднажод ва вазири мубориза бо маводи мухаддири ин кишвар Зарор Муқбил, раиси Хадамоти давлатии назорати маводи мухаддири Ҷумҳурии Қирғизистон Олимбек Султонов мулоқот намуд.