Наврӯз дар Парлумони Аврупо

Душанбе, 28 март. (АМИТ «Ховар»). – Чанде пеш бо ибтикори ноиби президенти Парлумони Аврупо Изабел Дюран дар шаҳри Брюссел ба ифтихори Наврӯз маҳфили ботантана баргузор гардид, ки дар он намояндагони аҳли тиҷорат, илму фарҳанг, васоити ахбори оммаи Аврупо ва ҷамоаи тоҷикон ширкат доштанд. Шаҳрванди Тоҷикистон, донишҷӯи Донишгоҳи шаҳри Лювени Белгия Шоира Мӯҳсинова зимни суханрониаш аз ҷониби ҷамоаҳои тоҷикон дар Белгия, Нидерланд, Люксембург ва Фаронса аз анъанаҳои таҷлили Наврӯз нақл кард. Сипас маросими намоиши либосҳои миллии Тоҷикистон, Афғонистон ва Эрон баргузор гардида, барномаи консертӣ намоиш дода шуд.