Наврӯз олиҳаи ҳусни сол аст!

Душанбе, 20 март. (АМИТ «Ховар», Раъно Нусратуллоева).- Бахшида ба ҷашни Наврӯзи Аҷам дар Осорхонаи маорифи Академияи таҳсилоти Тоҷикистон мизи мудаввар баргузор гардид, ки дар он олимони Академияи таҳсилоти Тоҷикистон, кормандони илмии Пажуҳишгоҳ ва донишҷӯёни Коллеҷи санъати ба номи Аҳмад Бобоқулов иштирок намуданд.  Дар ҷамъомад маърӯзаи номзади илмҳои педагогӣ Ҷамолиддин Саидзода дар мавзӯи таърихи таҷлили Наврӯз ва ҷаҳонишавии он шунида шуд. Саидзода зикр намуд,ки Наврӯз ҳамчун ҷашни миллӣ таърихи чандҳазорсола дорад ва аз оғоз бо руҳи байналмиллалӣ ҳамроҳ буд. Бинобарин мо бояд Наврӯзро бо талаботи рӯзгори муосир ва падидахои мутараққии он боз ҳам ғанитар созем. Ҷамолиддин Саидзода пешниҳодҳои мушаххаси худро оид ба таҷлили Наврӯз баён намуд,ки мавриди қабули донишмандон қарор гирифт. Олимон пешниҳоди Ҷамолиддин Саидзодаро маъқул донистанд ва онро ба маъмурияти Академияи таҳсилот, Вазорати маориф дар миён гузоштанд. Инчунин академик Маҳмадулло Лутфуллоев дар мавзӯи «Наврӯз ҷашни таърихист» ва Тӯйчӣ Миров дар мавзӯи «Васфи табиат дар ашъори Рӯдакӣ маърӯза намуда, андешаҳояшонро баён намуданд. Дар охири ҷамъомад донишҷӯёни Коллеҷи санъати ба номи Аҳмад Бобоқулов шеъру таронаҳои наврӯзӣ қироат намуданд.