Оғози кишти пунбадона дар Восеъ

Кӯлоб, 30 март. (АМИТ «Ховар», С.Холов). – Бо баланд гардидани харорати ҳаво ва гарм шудани замин кооперативҳо ва хоҷагиҳои деҳқонии ноҳияи Восеъ паи ҳам кишти пунбадонаро вусъат мебахшанд. Кооперативи истеҳсолии ба номи «Ҳоҷӣ Партов» яке аз хоҷагиҳои пешқадами ҷамоати деҳоти Тугарак ба ҳисоб меравад ва ҳамасола нақша ва дурнамои истеҳсоли маҳсулоти кишоварзиро барзиёд иҷро менамояд. Соли ҷорӣ низ яке аз аввалинҳо шуда он ба кишти пунбадона шуруъ намуд. Дар кооперативи мазкур дар баробари пахтакорӣ ба кишти сабзавоту полезӣ ва истифодаи оқилонаи замин, рӯёнидани ду- се ҳосил дар як мавсим аҳамияти ҷиддӣ зоҳир мешавад, ки аз ин ҳисоб сол аз сол сатҳи зиндагии саҳмдорон беҳтар мегардад. Ноҳияи Восеъ яке аз ноҳияҳои калонтарини кишоварзии минтақаи Кӯлоб ба ҳисоб меравад ва соли гузашта деҳқонони он дурнамои истеҳсоли маҳсулоти кишоварзиро барзиёд иҷро намуданд.