Пулҳои 20, 50 ва 100 сомонӣ- бо унсури ҳимоявии лазерӣ

Душанбе, 4 март. (АМИТ «Ховар», Покиза Маҳмадбекова). — Бонки миллии Тоҷикистон бо мақсади пурзӯр намудани унсурҳои ҳимоявии пулҳои коғазӣ бо қарори навбатии худ аз 5 марти соли равон пулҳои коғазии арзишашон 20, 50 ва 100 сомониро, ки дорои унсури ҳимоявии нав мебошанд, ба муомилот мебарорад. Ба мухбири АМИТ «Ховар» роҳбари хадамоти матбуоти БМТ Абдуғаффор Қурбонов иттилоъ дод, ки дар пулҳои коғазии номбурда, ки бо унсури ҳимоявии лазерӣ муҷаҳҳазанд, се адади охири рақами силсилавии пул дар рӯи навори кинеграмма бо тарзи лазерӣ чоп шудаанд, ба чашми оддӣ намоён гардида, ҳангоми ламс кардани ададҳои мазкур барҷастагӣ эҳсос мешавад.  Пулҳои коғазии дорои унсури ҳимоявии лазерӣ бо арзиши 20, 50 ва 100 сомонӣ дар қатори пулҳои ҳамарзиши намунаи соли 1999, ки дар муомилот қарор доранд, баробар гардиш менамоянд.