Тағйирот ба ду қонуни марбут ба терроризм

Душанбе, 6март. (АМИТ «Ховар», Марзия Саидова).- Вакилони Маҷлиси намояндагон ба ду лоиҳаи Қонуни Ҷумҳурии Тоҷикистон, ки вобаста ба терроризм аст -лоиҳаи Қонунҳои Ҷумҳурии Тоҷикистон ««Дар бораи мубориза бар зидди терроризм» ва «Дар бораи муқовимат ба қонунигардонии (расмикунонии) даромадҳои бо роҳи ҷиноят бадастоварда ва маблағгузории терроризм» тағйирот ворид намуданд.Саттор Холов- вакили палатаи поёнии Парлумони мамлакат вобаста ба масъалаҳои мазкур дар назди вакилон гуфт, ки лоиҳаи ин қонунҳо бо мақсади иҷрои тавсияҳои Гуруҳи татбиқи чораҳои молиявии муқовимат ба софкории пул (ФАТФ) ва «Нақшаи чорабиниҳо оид ба мутобиқгардонии қонунгузории Ҷумҳурии Тоҷикистон ба тавсияҳои ФАТФ», ки аз сӯи Сарвазири Ҷумҳурии Тоҷикистон дар таърихи 11 июни соли 2011 тасдиқ гардидааст, таҳия ва пешниҳод шудааст.Зикр гардид, ки лоиҳаи ин қонунҳо бо назардошти пешниҳоди мутахассисони ФАТФ омода гашта ва қабули онҳо барои тақвияти низоми Ҷумҳурии Тоҷикистон ва иҷрои уҳдадориҳои соҳавӣ аз рӯи нақшаи чорабиниҳо нигаронида шуда, ба Тоҷикистон имконияти хуби баланд бардоштани баҳогузории худро аз реҷаи «қатъӣ» ба реҷаи «муқаррарӣ» муҳайё хоҳад намуд.