Таҷлили Наврӯз дар Хадамоти муҳоҷират

Душанбе, 20 март. (АМИТ «Ховар», Музаффар Рустамов).–Имрӯз, 20 марти соли 2013 ҷашни байналмилалии Наврӯзи хуҷастапай дар Хадамоти муҳоҷирати назди Ҳукумати Ҷумҳурии Тоҷикистон бо шукуҳу шаҳомати хосса таҷлил шуд. Ба ин муносибат дар Хадамот бахшида ба ин ҷашни фархунда маҷлиси ботантана баргузор гардид. Муовини аввали сардори Хадамоти муҳоҷират Анвар Бобоев аз номи роҳбарият тамоми кормандони Хадамотро бо қадимтарин ва муқаддастарин оини ниёгони мо-ҷашни Наврӯз табрик гуфта, иброз дошт, ки ҷашни Наврӯз ба сарзамини биҳиштосои мо қадами мубораки худро гузошт ва дар дилу дидаи мо умед ба рӯзгори беҳтару зиндагии шодро бедор намуд. Сардори шуъбаи робита бо ҷомеа Абдулоҳи Қодирӣ матни табрикотро ба ҳозирин қироат намуда, иброз дошт, ки «Наврӯз дар фарҳанги тоҷикон ҷойгоҳ ва мақоми хосса дошта, ҷанбаҳои ахлоқии он хеле бузург аст. Наврӯз рамзи рӯзи нав, ибтидои соли нав ва иқдому амалҳои нави ободонию тозакориҳост». Дар фарҷом хони наврӯзӣ ороста шуд. Дар ин бора ба АМИТ «Ховар» сардори шуъбаи робита бо ҷомеаи Хадамоти муҳоҷирати назди Ҳукумати ҶТ Абдуллоҳи Қодирӣ иттилоъ дод.