Таҷлили Рӯзи Модар дар Минск

Душанбе, 7 март. (АМИТ «Ховар», Баҳманёр Муродов).- Дар арафаи иди модарон Сафири фавқулодда ва мухтори Ҷумҳурии Тоҷикистон дар Беларус Қозидавлат Қоимдодов дар шаҳри Минск бо аъзои клуби «Бонувони тоҷик» дидору мулоқот анҷом дода, онҳоро ба рӯзи модарон таҳният гуфт. Бино ба иттилои дафтари матбуоти Вазорати корҳои хориҷӣ Қозидавлат Қоимдодов дар суханронии худ аз ташаббусҳои Ҳукумати Тоҷикистон ҷиҳати дастгирии модарону кӯдакон ва пойдории оилаҳо ёдовар шуда, дар ин баробар нақши бонувонро дар рушди соҳаҳои гуногуни ҳаёти кишвар муассир арзёбӣ намуд. Дар анҷом ба бонувон аз тарафи созмони ҷамъиятии тоҷикон дар Беларус —«Сомониён» туҳфаҳои хотиравӣ тақдим гардиданд.