Ҳамкориҳо бо TICA вусъат меёбанд

Душанбе, 11 апрел. (АМИТ «Ховар», Покиза Маҳмадбекова). — Дирӯз дар Душанбе вохӯрии муовини вазири рушди иқтисод ва савдои ҷумҳурӣ Умед Давлатзод бо муовини сардори раёсати Туркия оид ба рушд ва ҳамкориҳои байналхалқӣ (TICA) дар назди Девони вазирони Ҷумҳурии Туркия Меҳмет Сюррейа ЭР доир гардид.  Ба мухбири АМИТ «Ховар» аз хадамоти матбуоти вазорати мазкур иттилоъ доданд, ки тақвияти рушди муносибатҳои дуҷониба, омода намудани мутахассисон дар соҳаҳои мухталиф, аз ҷумла дар самти рушди минтақаҳои озоди иқтисодӣ ва иҷрои корҳои вобаста ба лоиҳаҳои амалигардида дар Тоҷикистон аз мавзуъҳои калидӣ дар мулоқоти У. Давлатзод бо Меҳмет Сюррейа ЭР маҳсуб гардиданд. Мавриди зикр аст, ки фаъолияти TICA дар Тоҷикистон асосан аз ҳамкориҳои техникӣ дар соҳаҳои мухталиф иборат аст. Намояндагии ин созмон ҷараёни расонидани кӯмаки техникиро ҷиҳати татбиқи лоиҳаҳо дар соҳаҳои иқтисод, инфрасохтор, тандурустӣ, маориф, баланд бардоштани тахассус мунтазам таҳти назорат мегирад. Бо мақсади мусоидат ба рушди ҷумҳурӣ то имрӯз аз ҷониби Туркия тавассути TICA кӯмаки техникӣ ба маблағи бештар аз 7 миллион доллари ИМА расидааст. Дар интиҳои мулоқот ҷонибҳо атрофи нақшаю барномаҳои дар оянда амалишаванда мубодилаи афкори судманд намуданд.