Ҳифзи меҳнат- гарави пешрафти истеҳсолот

Душанбе, 16 апрел. (АМИТ «Ховар», Мавзуна Бойева).- Донишгоҳи давлатии авиатсионию техникии авиатсияи граждании шаҳри Маскав бо мақсади аз бар кардани меъёрҳои қонун ва санадҳои ҳуқуқии ҳифзи меҳнат аз рўи тавсияи Вазорати меҳнати Федератсияи Русия, мунтазам курсҳои такмили ихтисосро ташкил менамояд, ки дар онҳо мутахассисон аз кишварҳои собиқ Иттиҳоди Шўравӣ дарс меомўзанд. Дар курси навбатии омўзишие, ки дар шаҳри Маскав аз 17 март то 6 апрели соли ҷорӣ гузашт, сардори шуъбаи ҳифзи меҳнати «Фурудгоҳи байналмилалии Душанбе» Мирзомурод Саидов иштирок кард. Бино ба иттилои Мирзомурод Саидов барномаи таълимӣ дарсҳои назариявӣ ва амалиро дар бар гирифта, вобаста ба мавзуъҳои Кодекси меҳнат ва дигар асноди ҳуқуқӣ, меъёрҳои давомнокии рўзи меҳнат ва истироҳат, давомнокии соати корӣ ва рўзҳои кории кўтоҳшуда, пардохти музди меҳнат барои кор дар шароити меҳнати мушкил, ташкили кор оид ба ҳифзи меҳнат дар корхона омўхта шуд. Дар фурудгоҳи Душанбе кормандоне, ки дар шароити хатарнок ва зараровари истеҳсолӣ фаъолият доранд, ҳамеша таҳти назорат буда, бо воситаҳои махсуси инфиродӣ, аз қабили либос ва пойафзолҳои махсус, кулоҳ, асбобҳои радиатсиясанҷ, дозиметр, айнак, ниқоби зиддигазӣ ва дигар воситаҳои ҳимоякунанда таъмин буда, ҳамасола аз муоинаи ҳатмии тиббӣ мегузаранд. Дар ин бора ба мухбири АМИТ «Ховар» сардори дафтари матбуоти «Фурудгоҳи байналмилалии Душанбе» Маҳмаюсуф Шодиев иттилоъ дод.