Flydubai ба хатсайри мустақими Душанбе- Дубай оғоз мебахшад

Душанбе, 8 апрел (АМИТ «Ховар»).- Ширкати ҳавопаймоии Flydubai (ФлайДубай) аз зумраи ширкатҳои навовари шаҳри Дубай буда, дараҷаи сарфакор дорад ва аз 1 майи соли 2013 байни Душанбе ва Дубай парвози мустақими ҳавопаймоҳоро роҳандозӣ мекунад. 24 апрели соли 2013 он ба шаҳри Уши Қирғизистон хатсайр боз мекунад. Сардори ширкати flydubai Гейт Ал Гейт зикр намуд, ки : “Бо оғози ин ду хатсайр миқдори шабакаҳои парвози мо ба кишварҳои ИДМ ба бист мерасад, ки дар муддати кӯтоҳ комёбии беназир аст. Ба бозори мазкур ҳанӯз феврали соли 2012 бо парвоз ба шаҳри Бишкек шомил шудем. Ба шаҳрҳои Душанбе ва Ӯш хатсайр боз намуда, мо шабакаи парвози худро васеъ менамоем» Ширкати ҳавопаймои Flydubai хатсайри тиҷоратии худро 1 июни соли 2009 оғоз намуда, дар тӯли 3 сол микдори ҳавопаймоҳои худро ба 28 адад расонида, бо навъҳои нави Боинг 737-800 Next Generation (Насли нав) ба 60 самти хатсайр парвоз мекунад. Парвоз аз Душанбе ҳафтае ду маротиба- рӯзҳои чоршанбе ва шанбе сурат мегирад. Рейси FZ778 аз Душанбе соати 04.50 парвоз карда, ба Дубай соати 07.30 вақти маҳаллӣ мерасад. Рейси бозгашт FZ777 аз Дубай, терминали 2 соати 22.05 парвоз карда, ба Душанбе соати 02.30 мерасад. Арзиши чиптаи тайёра ба ду самти равуо 545 доллари ИМА буда, гирифтани бағоч то 20 кило ва бағочи дастӣ то 7 кило мумкин аст.