Кишти чигит идома дорад

Душанбе, 16 апрел. (АМИТ «Ховар», Ҳотам Рабиев).-Тибқи дурнамо имсол дар ноҳияҳои водии Ҳисор дар масоҳати 7 ҳазору 632 гектар кишти пунбадона гузаронида мешавад. То имрӯз дар масоҳати 4 ҳазору 324 гектар тухми чигит кишт шуд, ки ин 56 фоизи нақшаро ташкил медиҳад. Вобаста ба шароити обу ҳаво деҳқонони хоҷагиҳои ноҳияҳои Ҳисор, Рӯдакӣ, Ваҳдат, Шаҳринав ва деҳқонони шаҳри Турсунзода мавсими киштро идома медиҳанд. Имсол кишоварзон асосан навъҳои «Флора», «Кармен», «Намангон», «Ҳисор», «Истиқлол» ва дигар навъҳои тухми ватаниро кишт менамоянд.