Омодагиҳо ва оғози фаъолият дар корхонаҳои нав

Душанбе, 25 апрел. (АМИТ «Ховар», Бойева Мавзуна).- Бо мақсади татбиқи «Барномаи рушди масолеҳи сохтмонӣ дар давраи то соли 2015» ҷиҳати бунёди корхонаҳои нав, таъсиси ҷойҳои нави корӣ, ба роҳ мондани намудҳои нави масолеҳ, таҷдиди корхонаҳои амалкунанда идома дошта, ба истифода додани 25 корхонаи хурду миёнаи масолеҳи сохтмонӣ пешбинӣ шудааст.Дар семоҳаи якум дар ноҳияи Шўрообод корхонаи истеҳсоли қуму шағали ҶДММ «Анвар» бо иқтидори 40 ҳазор м3 дар як сол бо таъсиси 12 ҷойи корӣ ба фаъолият оғоз намуд. Сохтмони корхонаҳои оҳакбарорӣ дар ноҳияи Ғончӣ, ҶДММ «Спитамен» бо иқтидори 20 ҳазор тонна, корхонаи истесоли хишт дар шаҳри Ваҳдат- ҶДММ «Тян сой» бо иқтидори 5,0 миллион дона, коргоҳи хиштб дар ҶДММ «Кирамзит» (3,0 миллион дона), истеҳсоли семент аз клинкери воридотӣ дар шаҳри Конибодом- ҶДММ «Портландсемент» (20 ҳазор тонна) анҷом ёфта, дар семоҳаи дуюм истеҳсолотро ба роҳ мемонанд. Дар ин корхонаҳо 85 ҷойи нави корӣ пайдо мегардад. Дар ноҳияи Ёвон аз ҷониби ҶММ «Хуаксин Ғаюр семент» сохтмони корхонаи семент (бо иқтидори солонаи 1 млн. тонна) идома дорад. То имрӯз ба маблағи 85 млн. доллари ИМА корҳо анҷом дода шуда, таҷҳизоти технологии завод насб мешавад. Дар ин бора ба мухбири АМИТ Ховар аз дафтари матбуоти Вазорати энергетика ва саноати ҶТ иттилоъ доданд.