Озмуни «Элитаи бизнеси Тоҷикистон» идома меёбад

Душанбе,11 апрел.(АМИТ «Ховар»,Заррина Саидова ).-Имрӯз бо ибтикори Ассотсиатсияи миллии менеҷерон (АММ) дар бинои меҳмонхонаи «Гулистон-тур 2» бахшида ба пешрафти озмунҳои ҷумҳуриявии «Элитаи бизнеси Тоҷикистон» ва «Менеҷерони беҳтарини Тоҷикистон» дар соли 2013 ва идома додани онҳо нишасти матбуотӣ баргузор гардид. Ин озмунҳо барои аз ҷониби умум эътироф гардидани комёбию хизматҳои корхонаю ташкилотҳо ва менеҷерони Тоҷикистон, ки аз ҳама бештар саҳми худро барои рушди соҳибкорӣ дар ҷумҳурии Тоҷикистон гузоштаанд, равона гардидаанд. Ҳадафи асосии баргузории озмунҳо оммавӣ гардонидани соҳибкории ватанӣ, ташаккули симои мусбати соҳибкорон дар мамлакат, нишон додани кори менеҷер-идоракунандагони ботаҷриба ва пешқадам, тарғиби комёбиҳои онҳо ва ташаккули симои мусбати роҳбар- менеҷерҳо дар Тоҷикистон мебошад.