Пешбурди назарраси корҳои сохтмонӣ дар ВМКБ

Хоруғ, 23 апрел. (АМИТ «Ховар», Ҷ. Улфатшоев).-Пешбурди корҳои сохтмонӣ самти муҳим буда, дар давоми семоҳаи аввали соли ҷорӣ ҳаҷми маблағгузорӣ 27 362,4 ҳазор сомонӣ ташкил дод, ки ин нисбат ба семоҳаи аввали соли 2012 2,9 маротиба зиёд мебошад. Аз ҳаҷми маблағгузориҳо 8 378,3 ҳазор сомонӣ маблағгузории давлатӣ ва 1 894,1 ҳазор сомонӣ аз ҳисоби инвеститсияи хориҷӣ мебошад. Корҳои сохтмонию васлкунӣ дар ҳаҷми 27209,6 ҳазор сомонӣ иҷро шуданд.Инвеститсияи хориҷӣ 18 984,1 ҳазор сомониро ташкил дод, ки он дар сохтмони роҳи Шоҳон-Зиғар истифода шудааст.Тибқи қарори Ҳукумати Ҷумҳурии Тоҷикистон дар соли 2013 барои сохтмони иншооти мақомоти иҷроияи маҳаллии ҳокимияти давлатии вилоят 4,5 млн. сомонӣ пешбинӣ шудааст, ки ин маблағ барои сохтмони хонаҳои фарҳангии ноҳияи Рўшон, деҳоти Қурбоншо Гадоалиеви ноҳияи Роштқалъа , мактабҳои деҳаҳои Ғудараи ноҳияи Рўшон, Барсеми ноҳияи Шуғнон ва дигар корҳо равона мешавад.Дар семоҳаи аввали соли 2013 ҳаҷми корҳои пудратии ташкилотҳои сохтмонии вилоят 1821,0 ҳазор сомониро ташкил дод, ки ин нисбат ба семоҳаи аввали соли гузашта зиёд аст.