Созишномаи тавсеаи ҳамкорӣ дар доираи ИДМ тасдиқ шуд

Душанбе, 30 апрел.(АМИТ «Ховар», Марзия Саидова).- Созишнома оид ба ҳамкорӣ дар соҳаи таъминоти муҳандисии Қувваҳои мусаллаҳи давлатҳои иштирокчии Иттиҳоди Давлатҳои Мустақил /ИДМ/-ро ахиран вакилони палатаи поёнии Парлумони Тоҷикистон дар ҷаласаи Маҷлиси намояндагон тасдиқ намуданд. Суҳроб Маҳмадов-муовини вазири мудофиаи ҷумҳурӣ ва Абдузафар Иномов -вакили Маҷлиси намояндагон санади мазкурро дар назди вакилони Парлумон тавзеҳ дода, зикр намуданд, ки Созишнома 30 майи соли 2012 дар шаҳри Ашқобод аз ҷониби роҳбарони ҳукуматҳои кишварҳои ИДМ ба имзо расида, онро Президенти Ҷумҳурии Тоҷикистон Эмомалӣ Раҳмон ҷиҳати тасдиқ ба Маҷлиси намояндагон пешниҳод намудааст. Ҳадафи созишнома тақвияти муносибатҳо дар соҳаи минатозакунии гуманитарӣ, муттаҳидгардонии қувваҳо дар рушд ва мукаммалгардонии таъминоти муҳандисӣ, ҳалли масъалаҳои техникист. Инчунин ин санад ҷиҳати ҳамоҳангсозии фаъолият ҳангоми гузаронидани тадқиқоти илмӣ, тарҳрезӣ, коркард ва ба даст овардани воситаҳои таъминоти муҳандисии қӯшунҳои муҳандисии Қувваҳои мусаллаҳи давлатҳои ИДМ ва хароҷоте, ки ҳангоми иҷрои Созишномаи мазкур ба амал меоянд, нақши муассир мебозад.