Тақдими “Хазинаи тиллоии тоҷикон” ба Китобхонаи Австрия

Душанбе, 15 апрел (АМИТ «Ховар»).- Дар Китобхонаи миллии Австрия вохӯрии Намояндаи доимии Тоҷикистон дар назди САҲА, СММ ва дигар созмонҳои байналмилалӣ дар Вена бо cардори Департаменти рушд ва муносибатҳои байналмилалии Китобхонаи миллии Австрия хонум Элизабет М. Эдхофер баргузор гардид. Зимни вохӯрӣ ба Китобхонаи миллии Австрия нусхаҳои китоби “Хазинаи тиллоии тоҷикон” бо мақсади дастрас гардидани онҳо на танҳо ба хонандагони австриягӣ, балки барои мардуми кишварҳои дигари Аврупо тақдим шуданд. Дӯстдорони таърихи бебаҳо ва санъати пурганҷи тоҷикон метавонанд ин китобро мутолиа намоянд. Қобили зикр аст, ки Китобхонаи миллии Австрия таърихи 300- сола дошта, дар яке аз толорҳои қасри қадимтарини шаҳри Вена “Ҳофбург” ҷойгир шудааст. Китобхонаи миллӣ дорои тамоми китобҳои нашрияҳои Австрия, корҳои муаллифони австриягӣ, инчунин китобҳое, ки дар хориҷа нашр гардидаанд, мебошад. Дар хазинаи китобхонаи мазкур зиёда аз 7,5 млн. нусха китоб, 180 ҳазор папирус, ки аз ҳама қадимтарини он асри 15 мебошанд, мавҷуданд. Ғайр аз ин дар бойгонии китобхона дастнависҳо, китобҳои қадим (асри 6), харитаҳо, глобусҳо ва расмҳои нодир ҷой дода шудаанд.