Таъсиси хоҷагиҳои деҳқонӣ дар минтақаи Кӯлоб

Кӯлоб, 16 апрел. (АМИТ «Ховар», С.Холов). – Маркази кадастри замини минтақаи Кӯлоб бо мақсади татбиқи азнавташкилдиҳии ташкилотҳои кишоварзӣ, таъсиси хоҷагиҳои деҳқонии оилавӣ ва инфиродӣ, инчунин ҷорӣ намудани системаи моҳворавии координатҳо, корҳои заминсозӣ, геодезӣ, харитасозӣ ва дигар самтҳои ҳуқуқи истифодабарии замин ба аҳолӣ хизмат мерасонад. Директори марказ Карим Сафаров гуфт, ки мақсад аз таъсиси марказ мусоидат ба ташкили хоҷагиҳои деҳқонии инфиродӣ ва оилавӣ, инчунин ба онҳо ройгон додани сертификати замин мебошад. Масъулини марказ дар давоми се моҳи соли ҷорӣ аз ҳисоби 5 ноҳия: Фархор, Муъминобод, Шӯрообод, Восеъ ва Ҳамадонӣ 104 хоҷагии деҳқонии коллективиро азнав ташкил дода, 715 хоҷагии деҳқонии оилавию инфиродиро бо сертификати замин таъмин кардаанд.